La desatención a les Altes Capacidaes y les oportunidaes esbardiaes

  • 3 Marzu, 2018

Recoyío del facebook

Diego Rodríguez Toribio

 

Hai unos 15 años sentí per primer vegada nel ámbetu de l’Alministración Educativa que “les coses de palaciu van adulces”. Tamién sentí que tinía que dar tiempu, que taben dende l’Alministración “faciendo coses” col coleutivu d’Altes Capacidaes Intelectuales. Tres tou esti tiempu y una llucha titánica per parte de munches persones, sigo comprebando que NUN SE FIXO NADA RELEVANTE, sacantes quiciás dellos cambeos pa llimpiase la cara per parte de dellos políticos. La realidá ye que’l coleutivu sigui ensin ser atendíu afechiscamente, que paez que nesti país tou depende de la suerte del profesional que te toque y non a que’l sistema seya l’afayadizu p’atender a estos neños y neñes.

Tamién paez que sigue ensin entendese lo que ye atender afechiscamente a esti coleutivu y síguese cola mentira de la “atencion a la diversidá,” non porque nun seya necesaria sinón porque ye mentira que al coleutivu d’Altes Capacidaes Intelectuales se-y atiéndase dientro de l’atención a la diversidá, anque se xustifique siempres con esti términu pa dicir que ta atendíu.
Lo meyor, o lo pior, ye qu’a pesar de que tol mundu sabe que na xeneralidá nun s’atiende al coleutivu, dende l’Alministración miéntese una y otra vegada.
Dende hai más de 15 años atopé a pas y mas que realicen un esfuerciu titánicu por ameyorar la situación, pero siendo sinceru, tamién comprobé que na mayoría de los casos les families nun faen res, cenciellamente aceuten la situación, entá a sabiendes de que los sos fíos nun tán bien. Y tamién veo qu’a pesar de qu’esisten dellos profesionales qu’atienden al coleutivu ya inclusive dalgunos que son vraeros héroes y heroínes que lluchen contra vientu y marea por facer bien el so trabayu, inclusive lluchando contra les directrices de la mesma Alministración Educativu, la mayoría cenciellamente pasen d’atendelos. En munchos casos cola escusa de la falta de formación paez que tou ta solucionao.
La entruga ye ¿danse cuenta tolos axentes que tienen que ver cola educación de que falamos del futuru de los neños y les neñes con Altes Capacidaes Intelectuales? ¿Cuantes vides baldíes afeutaes nestos 15 años? ¿Quien va tener una rempuesta responsable?

This work is licensed under a Creative Commons Attribution 4.0 International License.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies