Naz l’Academia del Cine Asturiano

  • 28 Febreru, 2018

L’Academia del Cine Asturiano naz cola vocación de visibilizar y poner en valor les obres cinematográfiques asturianes y toes aquelles persones qu’intervienen nel so procesu de creación

El vienres 23 de febreru tuvo llugar la primera la primer asamblea de l’Academia del Cine Asturiano en Llaboral Ciudá de la Cultura na que participaron la práutica totalidá de les más de 60 persones inscrites hasta la fecha.

L’Academia surde con tres propósitos fundamentales y prioritarios nel arranque de la so andaura:

Identificar el cine asturiano y toes aquelles persones que participen del mesmu, dende dirección, producción, actoral o llabores téunicos bien seya nel mesmu territorio asturianu o más allá de les sos llendes, aunar a tol sector buscando puntos y espacios d’alcuentru y dignificar el nuesu cine al traviés de la so reconocencia y la de los sos profesionales, desendolcando pa ello un llabor d’espardimientu y pedagoxía énte’l públicu y les istituciones.

Nesta asamblea trazáronse los proyeutos pa esti primer añu d’andadra que s’empobinen a cubrir estes tres grandes víes d’actuación.

D’ente les propuestes aprobaes destaquen la ellaboración d’un informe inicial sobro la situación del cine asturiano en toles sos estayes, la creación d’espacios d’alcuentros col fin d’aldericar sobro les traces d’identidá cultural del cine asturiano , y la creación de grupos de trabayu que van encargase d’identificar les carencies y meyores urxentes que reivindica’l sector .

L’Academia tamién va participar como convidada, en marzu, nel Festival SACO Uviéu nun alcuentru con direutores y produtores del norte de Portugal.

L’Academia del Cine Asturiano naz arriendes de les xornaes del Industry Days d’Asturies, entamaes pol Festival Internacional de Cine de Xixón na pasada edición, na que munchos profesionales manifestaron la torga que supón el tar desconectaos unos d’otros. Selmanes dempués, la realizadora Teresa Marcos convoca a un grupu de cineastes a una xunta n’Uviéu cola intención inicial de valorar la posibilidá de reactivar ARDA (Asociación de Realizadores y Direutores Asturianos) como puntu d’alcuentru continuu.

Dempués d’un analís fondu surde’l propósitu de crear daqué distintu y capaz d’aunar y englobar a tolos departamentos responsables de la creación cinematográfica: una Academia del Cine Asturiano.

Anguañu, dicha entidá, presentada yá nel rexistru del Principáu, axunta hasta la fecha más de sesenta profesionales del cine asturianu, tando compuesta l’actual  Xunta Directiva por Pablo A. Quiroga Prendes, Juan Tizón y Melania Fraga.

Redaición InfoAsturies

This work is licensed under a Creative Commons Attribution 4.0 International License.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies