La CEA pidi l’esbarrumbe del banzáu de Pe

  • 13 Febreru, 2018

 

La Coordinadora Ecoloxista d’Asturies torna a pidir la estinción de la concesión del banzáu de Pe de la Viña nel ríu Eo, una de les principales torgues al caltenimientu del salmón y l’anguila

Yá nel añu 2016 reclamaron el valtamientu d’esti antiguu banzáu, del añu 1907, allugada ente les localidaes de San  Tirsu d’Abres en Asturies y Trabada en Llugo.

La valtaera d’esta torga supondría un bultable ameyoramientu, tanto pa la calidá de les agües como pa la calidá del ecosistema fluvial del Eo.

Nel ríu Eo esisten poblaciones de pexes migraores como’l sépalu (Alosa alosa), el salmón atlánticu (Salmu salar) o la llamprea marina (Petromyzon marinus), al empar que ye abelugu de l’anguila (Anguilla  anguilla), en peligru críticu de desaniciu, especies toes que se veríen descomanadamente beneficiaes pola baltadera d’esti banzáu.

La cuenca del Eo, que forma parte de la Reserva de la Biosfera Oscos Eo y Terras de Burón. Cuenta nel so calce con numberoses torgues que yá nun s’usen y que, según denuncien los ecoloxistes, estropien el natural desenvolvimientu de la fauna piscícola.

N’espera de la baltadera del banzáu, desixen que s’ataye de momentu la derivación d’agua, pa evitar l’amenorgamientu del caudal circulante.

Los usos hidroeléctricos son una de les presiones mayores que soporta esta cuenca del Eo, con 112 estracciones d’agua y un volume derivao de 13.287 hm3/añu d’un total de 15.192 hm3/añu, causando una considerable alteración de les condiciones hidromorfolóxiques de la cuenca, que carez nada menos que 57 derivaciones nel so parte occidental, previéndose la eliminación de torgues nel programa de midíes del so plan Hidrolóxicu .

Redaicion InfoAsturies

This work is licensed under a Creative Commons Attribution 4.0 International License.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies