La recuperación de les mazcarades d’iviernu aporta a Uviéu, onde los Mazcaritos lleven cinco díes -dende’l xueves de comadres- percorriendo les cais
Frente a la proliferación les caberes décades de celebraciones brasileires y/o televisives, que mos invaden con presonaxes disnei y antroxos de moda -esti añu toca antroxase d’unicorniu- resurden les tradicionales mazcaraes d’iviernu, burllones, satíriques, devolviéndonos les nueses tradiciones, cortaes de magar la guerra civil y la posterior dictadura.
Recuperaos de los antroxos de los años venti, relegaos por munchos años a dalgunos pueblos que supieron caltener la tradición y a les pintures d’Evaristo Valle,los Mazcaritos d’Uviéu tornen agora a la cai gracies al trabayu de los componentes de Paraísu Llocal creativu, que se propusieron recuperar los antroxos pal pueblu uvieín.
Son más de venti presonaxes estremaos, caún col so papel bien deprendíu: la destrozona, el paisanu antroxáu de muyer o bruxa con escoba, los sábanos con ropa de cama, los zaparrastros con sacos y cencerros, el vieyu y la vieya, el cura y el diañu, la rollona y el neñu, el galán y la madama, l’osu y los cíngaros, el xuan, l’aviador, y los grupos de soldaos, zuavos, moros, xitanos y sopistes de la estudiantina. Guía’l ciegu col lazarillu, manda un capitán y carga la mula col aguinaldu. cancien coples y faen comedies: el partu de la rollona col Mélicu; el xuiciu al pelele con xuez, pregoneru y guardies; o l’entierru la sardina, col cura, les llorones y l’enterrador. La murga o bandina de músicos acompaña la comparsa.
Entamaron el Xueves de Comadres, y salieron tamién el 10 de febreru, Sábadu Frixueleru ya’l 11 de febreru, Domingu Larderu; guei, 12 de febrero, celebrarán con una folixa pa la reciella el Llunes Gordu y desfilarán mañana, Martes d’Antroxu, col entierru la Sardina, con una cabera actuación el sábadu 17, cuando participarán nel desfile municipal.
Nuria Prendes
This work is licensed under a Creative Commons Attribution 4.0 International License.
