Acudirán coles sos reivindicaciones al manifestamientu del 24 de febreru n’Uviéu, a les 5 delantre la estación de Renfe

Tras una fonda reflexión acerca del capitalismu y de la so idega “d’algamar siempres el máximu beneficiu ensin cuntar coles consecuencies sobre la Tierra y les sociedaes humanes” aporten a la conclusión de que’l sistema educativu xuega un papel determinante na adoctrinación y la consecución d’individuos obedientes ya ensin capacidá de crítica.

Citando a Simone de Beauvoir,  “L’opresor nun sedría tan fuerte si nun tuviere cómplices ente los propios oprimíos”. “Lo único que s’espera de nós tres pasar per tola cadena de montaxe de la fábrica escolar, ye que seyamos bonos trabayadores obedientes y sumisos, meros productos pa poner en venta nel mercáu llaboral.

L’estudiu forciáu del estudiante tresfórmase nel trabayu alienáu del trabayador, y de la mesma mena que nun cuestionamos nin criticamos les coses que deprendemos, tampoco nos cuestionamos la nuesa función como pieces na cadarma que rixe la nuesa sociedá.”, declaren los estudiantes.
Poro, nun se planteguen  “meyorar”  la escuela istitucionalizada, sinón destruyir el sistema educativu y algamar una educación horizontal, autoxestionada y combativa, como mediu pa finar col capitalismu.

Nuria Prendes

This work is licensed under a Creative Commons Attribution 4.0 International License.