Bones noticies pal padrimoniu musical del país: tres de la gaita, toca-y a la tonada’l so reconocimientu nel conservatoriu de música

El gobiernu d’Asturies vien d’incluyir nel conservatoriu un itinerariu d’ensiñanza superior d’Istrumentos de la música tradicional y popular d’Asturies, nel que la incorporación más prestosa ye la de la gaita, que tien ya el so propiu gráu superior de música que, progresivamente, sedrá de cuatro años. La so incorporación entamará en setiembre y finará en 2022, un poco sero si consideramos que ye doscientos años depués que n’Inglaterra y venti más tardi que’n Galicia.

Pero eso nun ye tou: Tres de la gaita, toca-y turno a la tonada: ta tresnándose un  decretu pa incorporar a la enseñanza musical la especialidá Asturianada, el xéneru más identificativu y singular de la música asturiana, tresmitíu de xeneración en xeneración per sieglos y que vive nos caberos años un importante repunte, col espardimientu d’escueles de tonada y la incorporación d’abondes voces nueves.

L’aniciativa ya s’unvió pa la so aprobación al Ministeriu d’Educación y prevese qu’entre’n furrulamientu el prósimu cursu.

Llucía F.Marqués

This work is licensed under a Creative Commons Attribution 4.0 International License.