Dientro’l deterioru progresivu del sistema sanitariu, l’Asociación el Defensor del Paciente rexistra n’Asturies 302 denuncies per neglixencia médica

Los retayos en material y personal, la reticencia a realizar pruebes diagnóstiques derivaes de la falta de medios y la saturación del sistema deriven nun aumentu de los erros nel tratamientu de los enfermos.

Según s’esprende de la memoria añal na que l’Asociación del Defensor del Paciente recueye y fai balance de les quexes, reclamaciones, defeutos y neglixencies que llegaron a les sos oficines a lo llargo l’añu pasáu, la sanidá asturiana recibió nel 2017 un total de 302 presuntes neglixencies médicu-sanitaries, anque la mesma asociación reconoz que la mayoría de los casos queden ensin denunciar por falta d’información de los usuarios sobro los sos drechos.

El mayor porcentaxe de quexes recibíes ye por cuenta de les interminables llistes d’espera na Seguridá Social, poles qu’un paciente puede entardar más d’un añu pa ser atendíu, lo qu’acarreta consecuencies negatives pa la salú y en derives escontra la sanidá privada.

Nos casos que finen col fallecimientu ‘l paciente, les causes más frecuentes alegaes polos familiares son l’erru de diagnósticu y la perda d’oportunidá terapéutica, les altes anantes de tiempu, les intervenciones mal realizaes, l’atención deficiente, les infeiciones hospitalaries y los retrasos nel tresporte n’ambulancies.

Los servicios con más quexes rexistraes por esta asociación foron los de Ciruxía xeneral, Urxencies, Traumatoloxía, Xinecoloxía y Obstetricia, Tresporte sanitariu y Ambulancies, Odontoloxía, Anestesia y reanimación, Uroloxía y Neurociruxía.

Llucía F. Marqués

This work is licensed under a Creative Commons Attribution 4.0 International License.