Villaviciosa acueye el prósimu 20 de Xineru, de magar les cinco la tardi la V Carrera Popular escontra la Fibrosis Quística
Con esta preba esportiva, que cunta cola categoría de “Discapacidá Orgánica” -ello ye que ta pensada pa que puean participar esportistes con discapacidaes intelectuales y/o físiques- recabaránse fondos pa l’Asociación Asturiana de la Llucha escontra la Fibrosis Quística.
Nella podrán participar toles persones mayores de 16 años que lo deseyen, federaes o non, teniendo que finar el percorríu, de siete kilómetros, nun tiempu másimu de 75 minutos. Les categoríes estremaránse en Xeneral y Especial, dixebrándose la primera sigún edá y la segunda acordies la triba de discapacidá (visual, intelectual, orgánica, del tren inferior o superior)
El plazu d’iscripción ya ta abiertu y la cuota sedrá de 10 € dica’l domingu 15 de xineru y de 12 € del 15 al 20, cola esceición de la categoría sub18 que cuntará con un descuentu del 50%.
Los tres primeros clasificaos de ca categoría ya l’equipu con mayor númberu de participantes recibirán un troféu y tolos participantes entrarán nun sortéu de regalos.
L’Asociación Asturiana de Llucha escontra la Fibrosis Quística lleva 30 años na xera d’esparder el conocimientu d’esta malura, sensibilizando a la sociedá nes dificultaes que causa y dando puxu a aiciones que meyoren les condiciones de vida y l’acesu al tratamientu afayaizu de los pacientes.
Nel Dos Santos
This work is licensed under a Creative Commons Attribution 4.0 International License.
