L’anulación de les ordenances d’usu y promoción de la llingua asturiana en Noreña dexa nidia la necesidá de declarar la oficialidá darréu

Conceyu Abiertu reclamará la sentencia del Tribunal Superior de Xusticia d’Asturies qu’anula la Ordenanza d’usu del asturiano en Noreña, democráticamente aprobada n’alcuerdu plenariu n’ochobre de 2016.

La sentencia nun pon en dubia la llexitimidá de los drechos recoyios nes ordenances sinón que se basa en dos defeutos de forma o “incumplimientos” que lleven al TSXA a anular les ordenances; el primeru alcuéntrase, nel artículu 1.1 “la llingua asturiana o asturianu ye, xunto al castellanu, la llingua propia del Conceyu de Noreña, de l’Alministración llocal y de les corporaciones públiques que d’ella dependen”, que-y daría al asturianu rangu d’oficialidá, pa lo que l’Ayuntamientu nun tien competencia. Con esta supuesta irregularidá ya intentaron valtar hai 7 años, ensin ésitu, les ordenances d’usu del asturianu de Carreño.

El TSXA estima amás una irregularidá importante la falta l’informe económicu o memoria financiera de les ordenances, un posible error de procedimientu que puede dar problemes, pero que ye solventable, polo que dende Conceyu son optimistes. Los servicios xurídicos de la casa conceyu ya tan trabayando pa interponer el recursu que torne a Noreña les sos ordenances.

Pel so lláu Mercedes Fernández, cabezalera del PP –partíu que llevó les ordenances al TSXA- vien de facer unes contradictories declaraciones qu’espeyen la surrealista situación llingüística que se carez n’Asturies, al felicitase pola anulación y anunciar que’l so partíu votará escontra la inclusión de la oficialidá nel estatutu «aunque somos partidarios, y muncho, de la defensa del asturianu».

Nuria Prendes

This work is licensed under a Creative Commons Attribution 4.0 International License.