El sábado 9 d’Avientu entama el tornéu qu’enfrenta a los meyores xugaores de tol añu

Los caberos quince díis del añu tan reservaos pa los amantes de los bolos ; ye nestos díis cuando se cellebra el campeonato de les estrelles en versión cuatriada, el Tornéu de Navidá, nel que namás que xueguen los meyores.

Nesti tornéu participen tolos xugaores del país que fueren campiones a lo llargo l’añu en dalgún tornéu de los que se xueguen a lo llargo la xeografía asturiana na modalidá de cuatriada, más el subcampeón de les xornaes esportives de la Calzada y un xugaor de la Peña Reculta convidáu pola organización.

Esti añu participen representantes de les peñes Villa la Sidra, Reculta, Llugones, El Piles, Magdalena, Villa Noreña y Venta los Probes, siendo la peña El Piles la única que presenta un doblete, al cuntar con dos campiones pente les sos files.

El tornéu, que se xuega na Bolera Reculta (Xixón) entama esti sábado nueve a les cinco la tardi. Como n’anteriores ediciones formaránse dos grupos de cuatro xugaores caún que disputarán en lliguina, cellebrándose la final el 30 d’avientu.

Llucía F. Marqués

This work is licensed under a Creative Commons Attribution 4.0 International License.