La contaminación nun dexa descansu n’Asturies

  • 7 Avientu, 2017

Tres díes d’alarma por micropartícules en Sieru, dos por benceno n’Uviéu y  picos de partícules que subieron ayeri dica’l 670% en Xixón

La bona noticia de la selmana ye l’aceutación de la so responsabilidá na contaminación atmosférica por parte d’Arcelor y la so anuncia de meyores nes sos istalaciones coles que s’espera amenorgar bultablemente’l problema nos prósimos años. Sicasí, entantu y non, los ingresos hospitalarios por problemes derivaos de la mala calidá del aire siguen rexistrando cifres esmolecedores y los porcentaxes de contaminación siguen superando, cuasique a diario, los másimos recomendables pa la salú humana.

Les alarmes saltaron de nuevu esta semana nos grandes nucleos de población, por ser los que más cerca tienen los focos contaminantes, pero tamién por ser nellos onde tan allugaes la mayoría de les estaciones de midición.

La única estación que da datos en continuo en Sieru, escondía nel patiu l’istitutu de Llugones, a salvu de los mayores focos de contaminación, rexistró ayer por tercer díe consecutivu valores qu’indiquen una permala calidá del aire, algamando picos de 63 µg/m3 nes partícules más piqueñes y de   119 µg/m3 les Pm10

Per otru lláu, ayeri en Xixón les micropartícules algamaron valores mui perriba de lo recomendao na práutica totalidá de les estaciones midiores.

El problema n’Uviéu nun foron les partícules, sinón la concentración de bencenu nel aire, qu’algamo cotes de 33,8 µg/m3 con una media de les 24 hores de 9,5 µg/m3, , siendo la llegalmente permitida de 5 µg/m3 y la recomendá pola OMS 1,7.

Hay que remembrar qu’Uviéu ye’l puntu peninsular con mayor concentración de bencenu, un de los contaminantes más peligrosos pa la salú humana ya que se-y considera, pente otres cuestiones, un fautor de riesgu de cáncanu.

Llucía F. Marqués

 

 

 

This work is licensed under a Creative Commons Attribution 4.0 International License.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *