Charra de Pablo Hasel en Xixón

  • 6 Avientu, 2017

Con motivu del díe de la Costitución, l’ Asociación Astur-Cubana Bartolomé de las Casas trae a Asturies al popular raperu de Lleida, al que se-y piden penes de fasta doce años de cárcele por espresar les sos idegues nos sos cancios

Pablo Hasel, perconocíu poles sos lletres reivindicatives percrítiques pa col sistema tará esti Sábadu a les seis de la tardi nel Centru Social Autoxestionáu La Llume pa cuntar la so esperiencia cola represión de les llibertaes.

La lletra de los sos raps, los contenios de los sos artículos ya incluso de los sos tuits tan siendo xulgaos pola llei española como “delitos d’opinión” al declarase abietamente contra la monarquía, les tortures policiales, la esistencia ya’l tratu vexatoriu daos a los presos políticos ya’l sistema en xeneral. Los xuicios que tien abiertos sumen un total de pidiciones de prisión que sobrepasen los doce años.

La cuestión de los presos políticos nun ye nueva nin ye esclusiva Catalunya/Euskalerria, hai decenes de causes abiertes por cancios, comentarios en redes sociales, pintaes, artículos, chistes o participación en concentraciones, en tol territoriu afeutáu pola llei española.  N’Asturies tamién actuó la censura, dándose  casos de ingresu en prisión de ciudadanos pola llibre espresión de les sos opiniones.

Poro, ye perimportante l‘alderique so represión y presos políticos d’España plantegáu por Pablo Hasel, que pon enriba la mesa la supresión de les llibertaes que se ta careciendo nos caberos años.

Llucía F. Marqués

This work is licensed under a Creative Commons Attribution 4.0 International License.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *