El día 4 d’avientu remataba’l plazu llegal pa que “tolos  bienes, servicios y redolaes d’interés fueren accesibles”, ensin que se cumplan estos requisitos n’abondos edificios ya istalaciones públiques

Mientres la celebración el 3 d’avientu del Día Internacional y Européu de les Persones con Discapacidá, dellos coleutivos fixeron notar la persistencia de dificultaes, discriminaciones y esclusiones rellacionaes cola inesistencia de les condiciones mínimes desixibles o coles faltes d’accesibilidá universal, que constitúin torgues munches vegaes insalvables para llevar una vida independiente y algamar una completa inclusión na comunidá.

Alvirtieron que dende la discapacidá encadarmada “van denunciase alministrativamente y van demandase xudicialmente les violaciones de drechos per falta d’accesibilidá universal; va desixise l’actuación de los poderes públicos para correxir los graves defeutos entá persistentes, y va promovese con mayor firmeza la toma de conciencia del valor de l’acesibilidá per parte de tola sociedá.

N’ Asturies, El Colexu d’Arquiteutos cifraba n’alredor 12.000 los edificios que cuntaben va 4 años con dalgún tipu de barrera arquiteutónica. Dende l’aprebación de la llei de Rehabilitación, Rexeneración y Renovación Urbana del añu 2013 foron cuasi 4.000 edificios los que realizaron obres para esaniciar estes barreres, amás de numberoses intervenciones p’ameyorar les condiciones de la vía pública n’esi sen -tornando a Xixón y Uviéu en dos de les ciudaes peninsulares con meyores condiciones d’acesibilidá-. Sicasí, son más de 8.000 los edificios restantes, ente ellos munchos pertenecientes a organismos oficiales, colexos, museos, estaciones y comercios, que siguen nes mesmes condiciones y les asociaciones ya avisen de que van dar guerra “dica que se cumpla la llei y se algame l’acesibilidá 100%”.

L’accesibilidá universal ye una obligación consagrada nel nuesu ordenamientu xurídicu y sobremanera na Convención Internacional de los Drechos de les Persones con Discapacidá, aprobada por Naciones Xuníes fai daqué más d’una década y que ye d’obligáu cumplimientu pa los países que la ratificaren.

Redaición InfoAsturies

This work is licensed under a Creative Commons Attribution 4.0 International License.