La reciella asturiana amosóse entusiasmao ante un unviáu de la Navidá que fala na so llingua

Esti domingu nel Acuariu L’Anguleru fexo la so primer apaición pública del añu, a traviés d’una videoconferencia a distancia dende la mar, ante una salón de conferencies atarraquitáu de neños y mayores ilusionaos con tornar a velu, anque namás los piqueños pudieron falar en direuto con elli y tresmiti-y los sos saludos y pidiciones.  Como ye vezu, l’Anguleru convidó a chocolate a los asistentes.

Na so intervención afirmó q’entá nun entamare’l so viaxe de vuelta a casa, pero confirmó que les captures d’angula son ya abondes como pa garantizar los regalos a tola xente, animando a pidir a los indecisos. El 22 d’Avientu fadrá una visita al Acuariu de Xixón en presona, pa recoyer les caberes cartes, y los díis anantes percorrerá dellos colexos asturianos.

Aprofitando la ocasión presentóse nel Acuariu’l llibru “Un Nadaliegu Perbullindiegu” nel que, amás d’una prestosa aventura con illustraciones de Berto Alvarez Peña, alcontramos desplicación a la maxa del Anguleru y los Llendaores ya interesante información so los vezos navidiegos tradicionales asturianos.

Llucía F. Marqués

This work is licensed under a Creative Commons Attribution 4.0 International License.