Los datos de les estaciones midiores de la contaminación na ciudá apurren davezu datos bien perriba de la media permtía pola Organización Mundial de la Salú

Los valores llende diarios de partícules suspendíes nel aire fueron superaos de cutio, les midíes de bencenu (sostancia conocida pol so potencial efeutu canceríxenu) fixeron saltar les alarmes n’abondes ocasiones, los ingresos por enfermedaes respiratories multiplíquense y les nubes de fumu procedente de les chimenees entamen a paecer yá parte del paisaxe xixonés.

La completa indiferencia de les autoridaes énte tan esmolecedora situación y la falta de propuestes pa enfrentar estos problemes entama a fartucar a los vecinos, que tán preparando una manifestación a la que llamen a participar a tolos ciudadanos.

Per otra parte, una delegación d’Andecha Ástur va llevar la cuestión al Parllamentu Européu pa solicitar dende ellí que los entes competentes desixan una inmediata actuación al gobiernu asturianu pa enfrentar el problema.

Redaición InfoAsturies

This work is licensed under a Creative Commons Attribution 4.0 International License.