La mayor cayía de población correspuende a les edaes d’ente cero y diez años, mientres que los centenarios triplicaránse anantes del 2.031

Les previsiones realizaes so los datos de los caberos años y proyeutaes fasta’l 2.031 debuxen una progresión alarmante pa la población asturiana. Nel 2.022, dientro de namás cinco años, el númberu d’asturianos censaos sedrá de menos d’un millón, rexistrándose los peores datos nes edaes menores. Por contra, pa esa fecha vivirán n’Asturies 645 centenarios, cuasi 200 más qu’agora mesmo.

L’amenorgamientu poblacional previstu dase namás nes edaes pente los cero y los cincuenta y cincu años, albidrándose que los mayores d’esta edá incrementaránse añu a añu, añadiendo al problema de la falta de población el del enveyecimientu de la mesma. Nestos cálculos, fechos pol Sadei (Sociedá Asturiana d’Estudios Económicos ya Industriales) cuéntense non solo los ñacíos n’Asturies, sinón que se calcula tamién los inmigrantes qu’aportarán al país nesti tiempu.

De nun camudar les tornes, pal 2.031 (fecha llende d’esti estudiu) vivirán n’Asturies alrodiu de 925.000 presones, de les que 234.000 tendrán más de setenta años (frente a los 186.000 actuales) ya’l númberu de presones n’edá escolar (menores de 19) cayerá en más de 40.000.

Dende Andecha Astur lleven años denunciando lo que dende la organización se llama “Crónica d’un xenocidiu anunciáu” y afalando a estudiar les causes que xeneren el despoblamientu d’un país de tanta riqueza como’l de nuesu, que cuenta con bayura de recursos pero que nun ye quien a caltener el nivel de vida que permita a los sos ciudadanos vivir dignamente ensin vese forciaos a emigrar.

Redaición InfoAsturies

This work is licensed under a Creative Commons Attribution 4.0 International License.