La Conseyería d’Educación acaba de presentar a les organizaciones sindicales qu’integren la Xunta de Personal Docente una propuesta que permita’l trabayu voluntariu per parte de profesores xubilaos nos centros educativos
El sindicatu d’enseñantes asturianos, SUATEA, espresó’l so refugu al voluntariáu de profesores xubilaos nos centros docentes. Pal sindicatu esta nun ye la salida al problema de la sobrecarga burocrática que carecen los centros educativos, frutu de les insuficientes plantiyes docentes y alministratives y de los retayos presupuestarios. La mayoría de les actividaes propuestes por que seyan desenvueltes pol profesoráu xubiláu nos centros son xeres qu’anguañu pertenecen a trabayadores n’activu, polo que munchos tarrecen qu’esta midía pueda derivar n’una “puerte” para la man d’obra de baldre, trayendo consigo una mayor inestabilidá para’l restu de trabayadores y acarretando, si non el despidu, siquier la non contratación del personal necesariu pa cubrir tales actividaes.
Amás de pidir la retirada d’esta iniciativa, SUATEA encamienta a la Conseyería a enfrentar d’una vegada por toes la reversión de los retayos impuestos dende 2012 “que dinamitaren la organización de los centros docentes, les condiciones llaborales del profesoráu y, poro, la calidá educativa que s’ufierta al alumnáu” y anuncien que, en casu de persistir la Conseyería nes sos intenciones, va actuar contra esta circular con tolos medios al so algame, incluyíos los xurídicos, para torgar qu’afeute a los puestos de trabayu, tantu docentes como non docentes.
Redaición InfoAsturies
This work is licensed under a Creative Commons Attribution 4.0 International License.
