Autorizada la eliminación de 230 Mabees nes cuenques asturianes

  • 23 Outubro, 2017

Trece coleutivos roblen un manifiestu a la escontra de la matanza añal d’estos páxaros, qu’enfrenten a ecoloxistes, pescaores y alministración

La Mabea grande (Phalacrocorax carbo)  ye una especie migratoria, ivernante nos ríos y costes asturianes, non alóctona nin invasora, de la que ca añu se fai “llimpieza” col envís de caltener la población piscícola pa los pescaores esportivos. Esti añu el“Principado” vien d’autorizar la muerte de 230 mabees nos ríos asturianos (130  nel Nalón y afluentes, 40 nel Narcea, 30 nel Sella, 20 nel Deva/Cares y Bedón, 5 nel Esva y 5 nel Navia)..

A los pescaores esportivos, que soliciten incrementar los controles lletales de Mabea grande nes cuenques d’Asturies y eliminar la metá de la población ivernante nel país, abúltenllos pocos, y desixen amás que se maten otres especies, como llóndrigues, garces y andarríos.

A les trece asociaciones ecoloxistes roblantes del manifiestu a favor de la mabea abultallos una desaxeración, destacando que nos caberos 11 años los controles poblacionales d’esta ave van finando oficialmente con 2300 exemplares, ensin que s’aprecie meyora nes poblaciones de salmónidos (Trucha común y Salmón atlánticu), oxetivu teóricu d’esti sistema. Nel documentu apurren datos ya informes nos qu’amuesen la inutilidá d’esti sistema como mediu de control de la población n’aves y como camín pa meyorar el númberu de pexes en ríos.

Entanto y non, los vraeros problemes pa les poblaciones piscícoles asturianes siguen ensin ser trataos: la contaminación de les agües, la introducción d’especies alóctones, el furtivismu, la sobrepesca y, sobre tou, la estroza de los hábitats fluviales, que van erosionando pali que pali la fauna  los nuesos ríos.

Llucía F. Marqués

This work is licensed under a Creative Commons Attribution 4.0 International License.

Deixa unha resposta

O teu enderezo electrónico non se publicará Os campos obrigatorios están marcados con *