La I Carrera pola Oficialidá va cellebrase’l 14 d’ochobre en Santuyanu (Bimenes), con dos percorríos d’estremada dificultá, pa facilitar la participación de tolos que quieran reclamar la oficialidá de la llingua asturiana, la dignificación de la mesma y la visibilidá del nuesu idioma
Güei yera’l caberu díi pa escribise na Carrera pola Oficialidá entamada pol Conceyu Bimenes y la Xunta pola Defensa de la Llingua Asturiana (XDLA), pero la organización decidió ampliar el plazu hasta la viéspora de la mesma, el vienres 13 d’ochobre.
Los corredores más avezaos percorrerán tol conceyu, pasando trés parroquies: Santu Medero, Santuyanu y Suares, nun duru circuitu de 16 km con salida y meta en Santuyanu, con un tiempu másimu de 2 hores y 30 minutos. Esta ruta tien desnivel positivu de 340 metros y calter competitivu, con un preciu d’inscripción de 3 euros.
Los esportistes más modestos tienen la posibilidá de participar na versión curtía y llana, con namás tres Km y 6€ d’iscripción. La reciella tamién podrá participar nesta carrera, siempres que los pás avisen previamente pa tomar toles precauciones.
A cada correor apurriráse-y un dorsal con chip, seguru, camiseta conmemorativa, avituallamientos y bolsa. Los trés primeros clasificaos de la carrera llarga, homes y muyeres, llevarán troféu, mentes que pa la carrera curtía namás habrá premiu pal home y muyer más rápidos de la preba.
Dende la organización animen a aprofitar esta ampliación y apuntáse a la carrera “La oficialidá ye un camín difícil y duru; pero nun hai cuestes, nin quilómetros, nin torgues que mos paren. La dignidá de la llingua asturiana pasa pola oficialidá. Apúntate y cuerre con nós na Carrera pola Oficialidá”.
Llucía F. Marqués
This work is licensed under a Creative Commons Attribution 4.0 International License.
