La contaminación torna disparase nel centru d’Asturies

  • 5 Outubro, 2017

Na cabera selmana los datos por contaminación disparáronse en tola zona centro, a pesar de les lluvies intermitentes, con  un +3.100% de contaminación por partícules nel aire de Xixón, un 900% más n’Uviéu’l trés d’ochobre y cinco díes consecutivos con +500% en Sieru, amás d’importantes picos por bencenu n’Avilés

Entá teniendo namás en cuenta los datos apurríos pola web del Gobiernu d’Asturies, los datos –yá xeneralmente altos- sobro contaminación na zona centro asturiana resulten alarmantes, polo que la Coordinadora Ecoloxista d’Asturies pidió esplicaciones a la Conseyeria d’Infracadarmes y a los respeutivos conceyos pa saber d’aú proceden estos picos contaminantes.

Ayeri Xixón algamaba niveles de 514 µg/m3 por contaminación de partícules de menos de 10 micres na estación de Montevil, partiendo de 16µg/m3 .

La nueche del 3 d’ochobre algamáronse na estación de Ventanielles (Uviéu) un picu de 372 µg/m3 de PM10 partiendo de 41 µg/m3. La mesma selmana rexistráronse’n Llugones valores que bazcuyaben ente los 102 y los 189 µg/m3.

Hai que recordar que la Organización Mundial de la Salú encamentó unos  valores llende pa partícules  de 20 µg/m3 de media añal pa les PM10 y un valor d’alerta con una media diaria de 50 µg/m3 pa les PM10, polo que toes estes midíes indiquen la presencia de niveles peligrosos pa la salú humana.

Per otru llau, en Llaranes el problema ta nel bencenu, que’l llunes pasáu xorreció de 4 µg/m3 a 11,7 µg/m3 – bien perriba del 1,7 aceutáu pola OMS. Aparentemente esti bencenu vien de les bateríes, detectándose la xubida inclusive nel mididor d’Arobias, a más de tres Km de distancia.

En conxuntu fálase d’una situación de contaminación del aire costante y peligrosa pa la salú qu’esmolez seriamente a la población y ante la cual la inación de les autoridades competentes abulta incomprensible.

Llucía F. Marqués

This work is licensed under a Creative Commons Attribution 4.0 International License.

Deixa unha resposta

O teu enderezo electrónico non se publicará Os campos obrigatorios están marcados con *