Descomanaes nubes naranxes sumáronse ayeri a les avezaes emisiones de l’acería d’Arcelor en Carreño, xenerando alarma pente los vecinos
Anque les nubes acollorataes y anaranxaes son yá avezaes nel procesu del convertidor de l’acería, la d’ayeri foi especialmente llamativa tanto pol so tamañu como pola so intensidá, reavivando la esmolición y los pidimientos de solución de les persones que carecen esta polución.
L’acería, que tien 27 años, reformó l’añu pasáu los sos convertidores, colo que s’esperaba que remitieren les emisiones de partícules con metales que se daben d’avezu. L’arreglu menguó’l tamañu mediu de les nubes, pero coles mesmes multiplicó la so frecuencia, colo que la contaminación xenerada nel procesu sigue afeutando gravemente a los vecinos de Carreño y a la calidá del aire de tola zona.
Pa la Coordinadora Ecoloxista d’Asturies, ta claro que l’actual procesu d’aspiración llaváu y depuración de gases de l’acería nun ye’l afayadizu y ye preciso ameyoralu ensin demoranza pa evitar estes continues emisiones contaminantes. Amás d’esta nube naranxa, ayeri detectáronse tamién nubes prietes na mesma instalación.
Hai que recordar que los picos de contaminación atmosférica disparen los ingresos hospitalarios n’Asturies por enfermedaes respiratories, d’alcuerdu a un estudiu epidemiolóxicu realizáu pola conseyería de Sanidá y presentáu l’añu 2016.
Llucía F. Marqués
This work is licensed under a Creative Commons Attribution 4.0 International License.
