Va ser empecipiada a les 20h nel Paséu de Begoña

Col llema “Les muyeres deciden. ¿En cuántes llingües hai falta dicilo?”, el Movimientu Feminista d’Asturies súmase güei, xueves, a los actos reivindicativos entamaos en tol mundiu con motivu del Día Internacional pol Drechu al Albuertu.

La convocatoria d’anguaño quier denunciar les desiguales llexislaciones ente los distintos Estaos d’Europa, qu’en munchos casos torguen a les muyeres exercer l’albuertu “de forma llibre, de baldre y segura”. De fechu entá sigue prohibíu en Malta y n’Andorra, mientres que’l so exerciciu ye bien restrictivu en Polonia y n’Irlanda, ente otros casos.

El manifiestamientu, dende’l Paséu de Begoña, va percorrer l’avenida de la Costa, la plaza L’Humedal, el Solarón, les cais Álvarez Garaya, Felipe Menéndez y Marqués de San Esteban hasta la plaza del Marqués, onde va ser lleíu un manifiestu que va demandar una “harmonización llexislativa europea” respectu al albuertu.

This work is licensed under a Creative Commons Attribution 4.0 International License.