Demientres años la ilesia católica rexistró al so nome bienes de toa triba, la mayoría públicos y de descomanada trascendencia padrimonial

El Grupu d’Inmatriculaciones n’Asturies vien de presentar nel rexistru de la Xunta Xeneral del “Principado” la pidición, empobinada a la Comisión de Pidiciones y Drechos fundamentales, pa que se guete del Decanatu de los Rexistros de la Propiedá, el llistáu de los bienes inmatriculaos pola Ilesia Católica nel país.

Anantes de qu’esta vía fore declarada nula pol Tribunal Européu de Drechos Humanos, dos artículos –el 206 de la Llei Hipotecaria ya’l 304 del Reglamentu Hipotecariu-  permitieron a la ilesia inmatricular  miles de bienes, la gran mayoría de naturaleza presuntamente pública y d’estraordinaria importancia padrimonial. El primeru equiparaba a la Ilesia Católica con una Alministración Pública, con permiso p’aceder al Rexistru de la Propiedá ya’l segundu apurría a los diocesanos funciones notariales, de mena qu’un obispu podía certificase a sí mesmu la titularidá d’un inmueble non inscritu.

La solicitú d’esti llistáu tien l’envís de poder contrastar la so titularidá y actuar na so contra nos casos en que se pueda demostrar que ye pública.

Llucía F. Marqués

This work is licensed under a Creative Commons Attribution 4.0 International License.