La Cámara de Comerciu, Industria y navegación señala que se va reproducir la situación anterior a la crisis

Álvaro Alonso Ordás, secretariu de la Cámara, manifestó que sectores como’l naval o el siderúrxicu tan empecipiando un ciertu procesu de recuperación, pero que por embargu nun esiste suficiente personal para cubrir los puestos de trabayu que se van a crear.

Por casu ente les empreses que van tener entueyos p’atopar personal tan les subcontrates del astilleru Armón Xixón, qu’en septiembre anicia la construcción d’un buque factoría pa un armador islandés que va precisar la contratación de 600 trabayadores.

La problemática ye entá mayor naquellos sectores qu’esixen mano d’obra con mayor especialización, porque non solamente ye necesariu un mayor nivel de formación sinón tamién d’esperiencia previa. Alcontrar un bon soldador, un bon caldereru o un bon torneru pue tener cierta dificultá si tenemos en cuenta que la mayestría pa dominar un oficiu varia ente los trés y los cinco años de trabayu nuna empresa.

This work is licensed under a Creative Commons Attribution 4.0 International License.