El referéndum convocáu por Andecha Astur nel que se llamaba a los asturianos a decidir el so futuru y el manifestamientu de Lluchando pola Soberanía protagonizaron n’Uviéu los actos más reivindicativos del Díi de la Nación Asturiana

“¿El Pueblu Asturianu tien drechu a decidir y escoyer llibremente’l do futuru, determinando’l tipu de gobiernu y l’ordenamientu Xurídicu-políticu d’Asturies?”. Esa yera la entruga llanzada ayeri na Plaza la Catedral nel referéndum simbólicu que sacó a la cai l’alderique alrodiu’l drechu a decidir de los asturianos .

Fasta la carpa eleutoral averáronse cientos de presones – mayormente asturianos pero tamién abondos d’estremaes nacionalidaes- onde amás de votar recibieron información de la situación d’indefensión democrática que carecemos n’Asturies, siendo que munchos de los asistentes, inclusu los asturianos, desconocíen el fechu de qu’a los asturianos nun se mos permitiere votar siquiera l’Estatutu d’Autonomía.

El manifestamientu, convocáu por Lluchando pola Soberanía, salió del Paséu los Álamos baxo’l llema ‘Lluches vieyes pa un país nuevu’ pa percorrer les cais del cascu vieyu y finar na Corrada l’Obispu, onde se celebró l’actu políticu. A ella acudieron representantes d’estremaes asociaciones coles sos reivindicaciones, ya que lo que pretenden ye amosar que la soberanía d’Asturies ye la manera de poner igua a los problemes del nuesu pueblu.

Entantu, tantu’l “Principado” como Podemos celebraron sendes folixes, los primeros na Llamorgal y los segundos nel Muséu del Pueblu d’Asturies. Foi llamativa l’ausencia d’actos por parte’l PAS ya IU, que nun consideraron preciso organizar dalu actu nel Díi de la Nación Asturiana

This work is licensed under a Creative Commons Attribution 4.0 International License.