Nos cursos d’afondamientu cultural y llingüísticu participaron más d’un centenar de persones en caún de los niveles que s’impartieron
Vienen de finar los cursos de branu de la Universidá Asturiana (UABRA) col actu oficial de preslle y la entrega de diplomes a los participantes nos mesmo, que se cellebró na tardi d’ayeri nel Paraninfu de la Universidá d’Uviéu, cola intervención de la Direutora de la UABRA, Dña. Cristina Valdés Rodríguez; la Teniente Alcalde de Cangas del Narcea, Dña. Laura Álvarez García; el Direutor Xeneral de Planificación Llingüística y Normalización, D. Fernando Padilla Palicio; el Rector de la Universidá d’Uviéu, D. Santiago García Granda ya’l Presidente de l’Academia, D. Xosé Antón González Riaño.
Los principales destinatarios d’estos cursos, que se desendolcaron en Cangas pente’l 31 de xunetu ya’l 11 d’agostu, son los mayestros de Llingua Asturiana n’Educación Primaria y Secundaria, asina como los titulaos por esta Academia y/o pola Universidá, seique pudieron participar nellos tamién presones que tuvieren superáu’l Cursu Avanzáu de conocencia del asturianu.
Esti añu foron ocho les opciones nes que participar, incluyendo, arriendes de los cursos puramente llingüísticos, un alrodiu de les Nueves Teunoloxíes na Educación ya otru de Cantares, bailles ya instrumentos musicales asturianos.
Paralelamente a los cursos tuvieron llugar cuatro conferencies con temes tan variaos como «L’AVE a Asturies: serviciu públicu y ecoloxía», impartida por Paco Ramos (Portavoz d’Ecoloxistes n’Aición d’Asturies) , «¿Ciudá Astur o acabar con Asturies?»
a cargu de José Alba Alonso (Doctor en Ciencies Económiques y Empresariales. Profesor Titular del Dept. d’Economía aplicada de la Universidá d’Uviéu), «Lliteratura y movimientu de vindicación en Lleón» na que falaron Xairu López, Nicanor García y Fran Allegre (Asociación Cultural Faceira) o «El Desterrado. Poder, historia e relato nel Alto Navia» por José Antonio Álvarez Castrillón (Doctor n’Historia. Profesor Ayudante Doctor del Dept. de CC.EE. de la Universidá d’Uviéu).
Dientro les actividaes de la UABRA los estudiantes pudieron tamién esfrutar de l’actuación de los grupos musicales «Corquiéu» y «Tuenda» asina como de la esposición «El Quixote ilustráu» de Juan Hernaz
This work is licensed under a Creative Commons Attribution 4.0 International License.
