Los elevaos valores que se midieron ayeri pela tarde na contorna de dellos contaminantes, como’l tolueno, podría tener que ver colos malos golores ya irritación de gargüelu y güeyos de los que se quexaron los vecinos d’Avilés y colos pexes muertos na ría
Acordies a los datos que facilita’l Gobiernu d’Asturies na so web d’alcuerdu a la obligación de comunicación diaria de contaminación atmosférica y calidá del aire, ayeri rexistróse na estación de Trasona de Corvera una importante xubida de los niveles de tolueno, con una media de les postreres 24 hores 5,29 µg/m3 ayeri – güei yá baxó a 0,69 µg/m3 – siendo’l valor de referencia de la calidá del aire según a la OMS de solu 0,26 mg/m3
El tolueno ye una sustancia nocivo pal ser humanu, anque la so tosicidá ye bien inferior a la que presenta’l canceríxenu bencenu. La esposición a grandes concentraciones puede provocar afecciones nel sistema nerviosu, y a baxes y moderaes dosis prodúcense síntomes de cansanciu, tracamundiu, febleza, perda de memoria, estomagaes, perda de memoria y de vista. Los vapores de tolueno presenten un llixeru efeutu narcóticu y agafen los güeyos, síntoma pol que se vieron afectaos numberosos vecinos de la contorna.
Disparáronse amás les midíes de PM10 (partícules de menos de 10 micres) na estación del polígonu de les Arobies na llende ente Avilés y Castrillón onde se llego a un picu de 216 µg/m3, y una media de les postreres 24 hores de les PM10 de 54 µg/ m3 , con una medría del 500% de les partícules. Hai que recordar que la Organización Mundial de la Salú encamentó un valor d’alerta con una media diaria de 50 µg/m3 pa les PM10.
Llucía F. Marqués
This work is licensed under a Creative Commons Attribution 4.0 International License.
