L’ERE robláu polos sindicatos UXT y CCOO y aplicáu en so momentu a la empresa Modultec-Imasa despidía mayoritariamente a muyeres, polo que foi llegalmente reconocíu como discriminatoriu y anuláu
Ta convocada una concentración protesta escontra l’ERE de Modultec-Imasa, consideráu discriminatoriu pa coles muyeres y fraudulentu, a la entrada de la inauguración de la Escuela de Branu d’U.X.T. Asturies, que tien esti añu como exe central les polítiques d’igualdá, oportunidá que quieren aprofitar pa resaltar la contradición pente la teoría, amosada nesta Escuela de Branu, y la práutica avezada de los grandes sindicatos, que roblen ensin problemes EREs como’l de so, agora anuláu por demostrase discriminatoriu pa col sesu femenín.
A la inauguración d’esta Escuela, que sedrá güei martes 5 de Setiembre a les 16:00 h. nel Centru de Servicios Universitarios d´Avilés, asistirán ente otros, el secretariu nacional de la UXT ya’l presidente’l “Principado”.
Dende CSI despliquen: “Queremos aprovechar la inauguración de dicha Escuela pa denunciar estes actuaciones del sindicalismu traidor y la complicidá activa del gobiernu del “Principado” que sovenciona a estes empreses con fondos públicos destinaos a promover la igualdá ensin desixir el cumplimientu d’esos fines”
Redaición InfoAsturies
This work is licensed under a Creative Commons Attribution 4.0 International License.
