• Portada
  • >
  • Otres
  • >
  • Entrevista a Luis Laria, fundaor del Parque de la Vida

Entrevista a Luis Laria, fundaor del Parque de la Vida

  • 1 Setiembre, 2017

Va cuasi trenta años surdió en L.luarca un ambiciosu proyeutu educativu que güei ye realidá gracies al enfotu ya la implicación personal de Luis Laria, fundaor del Parque y presidente del CEPESMA, qu’ensin subvenciones nin dala triba de sofitu oficial tornó lo que yera un ermu no qu’anguaño conocemos como’l Parque de la Vida, un espaciu onde non solo nos averamos a la ñatura nel sen más ampliu, sinón que de la man del so fundaor deprendemos a apreciala y respetala

  • ¿Cómo ñació’l Parque de la Vida?

Esti foi dende l’entamu un proyeutu personal, una rempuesta ante la progresiva desconesión de les persones, sobre tou de la reciella, cola ñatura, la vida, incluso colos sos iguales. Ca vegada veo esto más frecuentemente, sobre tou pente los adolescentes, a los que’l xorreciente usu de la teunoloxía ta llevando a un aislamientu terrible. Dase la paradoxa de tener milenta “amigos” en facebook al tiempu de vivir en soledá. Ye notable, por exemplu, lo difícil que ye alcontrar xente que te mire a los güeyos al falar.

Ye necesario abrir una ventana pente los seres humanos y la ñatura, la recuperación d’esta conesión permitiría recuperar tamién la visión de si mesmos, la so propia humanidá.

 

  • Agora mesmo’l Parque de la Vida cuenta con 5 percorrios, un planetariu, un observatoriu astronómicu, un cientru de recuperación d’animales, un reptilariu y dos museos … ¿había too eso nel to proyeutu anicial?

Cuando merqué esta finca, hai 29 años, yera una planicie ensin árboles. Agora hai llantaos 2.800. Los museos ya’l planetariu foron amestándose pali que pali, por exemplu los pelosinos tan equí a consecuencia del esbarrumbe del Muséu del Calamar Xigante nel 2.014. Nos caberos tres años hubo una inversión y un xorrecimientu importante. Arriendes d’ello, nun entamu yera un proyeutu más enfotáu a los neños, pero col tiempu foi medrando y agora tenemos visitantes de toles edaes.

Cumplís un importante llabor de divulgación científica y recuperación animal ¿Qué sofitu vos da l’alministración pública?

Dengún. El Parque de la Vida nun recibe nin recibió dala subvención nin ayuda oficial pal so caltenimientu, nin a nivel llocal nin nacional. Caltiense coles visites y con muncho esfuerzu personal.

 

  • ¿Recibís un volumen importante de visitantes?

Si, especialmente de colexos. Na temporada d’escuela tenemos a doce monitores atendiendo visites escolares, hai reserves ya a tres años vista. Cuasi la metá de los colexos que vienen son gallegos y eso trae depués a munchos visitantes d’ellí. Además, facemos Nueches Bruxes, con observación direuta del firmamentu, que tan teniendo perbona acoyida, y prestosos talleres baxo demanda, de fósiles, especies marines, astronomía…

 

  • ¿Son abondo estes visites pa caltener económicamente’l Parque?

El parque nun ye económicamente rentable, tien muncho mantenimientu y si seguimos con ello ye por enfotu en lo que facemos, non por perres. Podríemos falar d’una rentabilidá moral, ver que los neños salen d’equí más conectaos cola vida, perdiendo mieos y con más conocimientos, eso ye lo que paga.

Llucía F. Marqués

 

 

 

 

 

This work is licensed under a Creative Commons Attribution 4.0 International License.

1 Comment Already

  1. Cómo que nun tien subvenciones públiques? 15.000 € nel 2017. Nun sé por qué tiene qu’arrenegar d’ello.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *