Alrodiu de 140 asturianos al añu opten por quitase la vida dende l’entamu de la crisis. La PAH imputa cuasi’l cincuenta per cientu de los suicidios direutamente a la mala situación económica de los afeutaos o de les sos families

Según un estudiu de la Fundación Salú Mental pa la prevención de los trestornos mentales ellaboráu pa l’Observatoriu del Suicidiu, n’Asturies rexístrase una alarmante media de 13,9 casos por cada cien mil habitantes, siendo los  homes los que más conductes d’esti tipu amuesen y llegando a constituyir les cifres d’intentos ensin peracabar fasta’l 20% de toles urxencies siquiátriques.

Con cuasi 2.000 finaos por esta causa no que llevamos de sieglu, les cifres asturianes tán al nivel de les zones europees más castigaes por esti problema, compartiendo con elles dellos factores: Territorios fuertemente industrializaos en recesión, con población avieyao, munches vegaes d’orixe rural, con una fuerte dispersión y en situación de cayente económicu.

Dellos espertos apunten escontra otros aspeutos socioeconómicos, como por casu “la emigración de los más válidos, que fai qu’haiga bolses de población con llimitaciones”, especialmente nes fasteres rurales.

Otru denominador común ente les poblaciones con mayor incidencia de los comportamientos suicides ye la falta d’enraigonamientu, esto ye, con frecuencia son más los casos ente les persones que s’atopen aisllaes de la so cultura, xeneralmente inmigrantes. El casu asturianu ye peculiar a esi respeutu, siendo mayor la incidencia ente los asturianos de nacencia, dando llugar a pensar que quiciabes esista una correlación ente la desvinculación de la sociedá asturiana cola so cultura tradicional y l’aumentu de los suicidios.

Anque entá nun se cunta con datos sobro los sos resultaos, la Conseyería de Sanidá punxo apocayá en  marcha una estratexa pa prevenir el suicidiu, centrada na detección precoz y nel control d’aquellos qu’intentaron quitase la vida, anque ye xeneralizada la opinión de que sedría más eficiente acabar colos condicionantes oxetivos que deriven nesta tráxica salida.

Llucía F. Marqués

This work is licensed under a Creative Commons Attribution 4.0 International License.