Dende’l 2.003 la Universidá d’Uviéu queda fuera del ranking Shangai, qu’escueye les meyores universidaes del mundiu, cayendo esti añu fasta’l puestu 571
Acordies el Ranking Académicu d’Universidaes del Mundiu 2017 (ARWU), qu’ordena les universidaes en función de la so calidá y rendimientu -corrixendo los efeutos de les desemeyances de tamañu pa faceles comparables-, l’asturiana queda nel puestu 571, baxando de posición y calteniéndose na categoría de “candidatos” a ser de les meyores.
Ente los datos qu’analiza esti estudiu, incluise’l númberu d’escolinos ya’l so rendimientu, el porcentaxe del personal que ganare premios Nobel o la Field Medals, la Medalla Internacional pa Descubrimientos Sobresalientes en Matemátiques, el númberu d’investigaores citaos; el númberu artículos espublizaos enes revistes Nature y Science asina como’l númberu d’artículos incluyíos n’espublizaciones científiques.
Apaecer de nuéu nesti ranking, nel que la institución asturiana algamó un puestu bien curiosu nel añu 2.003, ye un de los oxetivos de la universidá. Esti sedría un mediu importante de visibilizar tolos llogros algamaos pola mesma, ya que son dellos los investigaores de la Universidá d’Uviéu qu’anguañu participen en trabayos d’importancia, especialmente nos campos de la melecina.
Les Universidaes de Harvard y Stanford (Estados Xuníos) y de Cambridge (Reinu Xuníu) son les tres meyores universidaes del mundiu mientres que la universidá helvética Swiss Federal Institute of Technology Zurich sigue siendo la universidá de la Europa continental meyor allugada, nel puestu númberu 20. La Universidá de Tokio, na plaza 24 caltiénse como la meyor situada d’Asia.
Redaición InfoAsturies
This work is licensed under a Creative Commons Attribution 4.0 International License.
