• Portada
  • >
  • Mediu Ambiente
  • >
  • El “Principado” ufierta proteición insuficiente pa la biodiversidá asturiana

El “Principado” ufierta proteición insuficiente pa la biodiversidá asturiana

  • 10 Agostu, 2017

El Llistáu d’Especies Monteses en Réxime de Proteición Especial del “Principado” d’Asturies y el Catálogu Asturianu d’Especies Menaciaes recueyen apenes la cuarta parte de la nuesa biodiversidá en peligru d’estinción

El Llistáu y Catálogu d’especies propuestu pol Gobiernu d’Asturies va sustituyir a los anguaño vixentes catálogos de flora y fauna d’Asturies. Nél recuéyense 16 especies en peligru d’estinción, 62 vulnerables a la estinción y unes noventa como protexíes.

D’alcuerdu  a los allegamientos presentaos pola Coordinadora Ecoloxista d’Asturies, estos datos tán bien perbaxo les necesidaes reales de proteición de la flora y fauna asturianes. El resume del estudiu realizáu pola C.E.A, indica qu’en Asturies hai 226 especies menaciaes d’estinción nes próximes décades, frente a les 78 que recueye’l Principáu y que ye recomendable la proteición de 294 especies adicionales pa torgar que pasen a tar menaciaes d’estinción.

Los llistaos oficiales inclúin ausencies tan notables como’l salmón (Salmu salar), en claru riesgu d’estinción en Asturies o la trucha (Salmu trutta) y l’anguila (Anguilla anguilla), vulnerables a la estinción, pente les especies piscícoles, o ente les aves el zarapicón (Numenius arquata) y l’escribán palustre (Emberiza schoeniclus),bien sensibles a los cambeos nel so ecosistema. Échense tamién en falta trés cascoxos acuáticos (Alzoniella asturica, Alzoniella marianae y Alzoniella montana, propios de fontes, regatos y fontes d’agües llimpies) esclusivos d’Uviéu, Grau y Salas, y asina fasta más de 200 especies en riesgu de sumir, munches d’elles esclusives del nuesu país.

El catálogu inclúi tamién erros de bultu, como citar subespecies mediterránees, en concretu la maeva moñuda, que nun tien nin tuvo nunca’l so hábitat n’Asturies.

Ente les plantes, destacar l’ausencia d’especies gravemente menaciaes como la Carex strigosa, con una sola piqueña población n’Asturies, nuna aliseda de Salas que ta siendo invadía por plantes alóctones, la Crepis novoana, que de tol planeta solo vive en dos hábitats, siendo un los cantiles de la sablera de Xagó, La Genista ancistrocarpa, con una piqueña población n’Asturies,  na zona onde pretendía asitiase la mina d’oru de Salave, la Plantago atrata, con una única llocalidá ibérica conocía de la especie nun puertu de monte en Ponga o la Rumex  rupestris con una única piqueña población conocía n’Asturies, en Peñarronda. Échense en falta tamién numberoses especies no que fai a hepátiques y mofos, al solu citar una especie nel Llistáu y Catálogu, faltando toles destacaes na revisión científica realizada na Llista Colorada de los Briófitos Menaciaos  (2012) como en peligru d’estinción.

Por tollo, la Coordinadora Ecoloxista d’Asturies, en realizando un pricurosu trabayu d’escoyeta de la información disponible al traviés de la revisión de la bibliografía científica y consulta a espertos nos estremaos grupos taxonómicos, ellaboró la so propia propuesta de Llistáu y Catálogu d’especies p’Asturies “basáu na meyor evidencia científica disponible y  encontáu dafechu en criterios científicos y oxetivos y na llegalidá vixente”, y presentóla al Gobiernu d’Asturies, nel marcu del periodu de participación pública, pa que pueda correxir y enmendar como correspuende la so propuesta.

Llucía F. Marqués

This work is licensed under a Creative Commons Attribution 4.0 International License.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies