Iniciativa pol Asturianu denuncia les presiones del  Istitutu Rosario Acuña de Xixón pa qu’un escolín nun escueya l’asignatura d’asturianu.

La familia del alumnu afeutáu púnxose en contautu cola asociación pa denunciar que’l centru pidió al estudiante qu’escoyera otra materia, col argumentu de que yera l’únicu que solicitare les clases de llingua.

L’estudiante, que llevaba estudiando asturianu dende primaria, recibió «presiones» de la xefatura d’estudios del centru, seique una vegada desplicaos los precedentes llegales al centru, esti nun tuvo otra opción qu’aceutar la so matrícula y permitir al rapaz cursar asturianu con normalidá.

Seique nun hai dalu cupu mínimu na asignatura y qu’una sentencia del Tribunal Cimeru de Xusticia d’Asturies respuende por que con un únicu  escolín que la reclame tien d’impartise, les presiones sobro alumnos y families son avezaes, sobremanera nos centros alcordaos, onde nun hai nin un solu alumnu matriculáu n’asturianu. La mayoría de los casos pasen desapercibíos y les families opten por arrenunciar a los sos drechos educativos pa evitar el conflictu.

La decisión d’esta familia, que quixo faer públicu’l casu inda cuando yá se solucionara la cuestión llegal, ye un exemplu a siguir pa visibilizar la represión y frenar les agresiones contra la llibertá llingüística.

Nin una agresión ensin respuesta.

Llucía F. Marqués

This work is licensed under a Creative Commons Attribution 4.0 International License.