La información comparativa de les captures de salmón rexistraes nes campañes de pesca dende’l 2007 a l’actual de 2017 amuesen un importante amenorgamientu nes captures

No que llevamos d’esta temporada de 2017 costátase un importante descensu d’exemplares oficialmente controlaos: si nel 2007 rexistrárense1417 captures nesta fecha, anguañu mengua a 379, un descensu importante inclusive comparando colos 941 salmones del añu pasáu. La Real Asociación Asturiana de Pesca Fluvial nun fai una llectura totalmente negativa d’estos datos, sinón qu’incide nel aumentu de la protección  de la especie.

Tabla 1: Evolución de la captures salmoneres al díi 3 de xunetu de 2017

Los datos recoyíos tamién amuesen un descensu nel pesu mediu de los salmones de más de seis quilos, siendo menor el total de pieces d’esi calibre prindaes no que va de temporada.

Comparando los datos estadísticos sobro’l pesu mediu y el númberu de salmones de seis o más quilos que se sacrificaron fasta’l díi 3 de xunetu de caúna de los diez últimes campañes respeutu de l’actual, -que los sos datos son los que s’amuesen na tabla 3, a la fin del artículu- reparamos que’l pesu mediu baxó en csi 400g, llográndose cuasi un terciu menos de pieces que nel 2007 y menos de la metá que va dos años, seique estes oscilaciones son frecuentes y esti nun ye’l peor añu nesi sen.

Los datos llograos en cuanto al númberu y pesu de los salmones de mayor tamañu dexen deducir un amenorgamientu paulatín na torna de los salmones de dos o trés años de mar, con pesu igual o superior a 6 kilogramos, lo que fai tarrecer un amenorgamientu del esgüeve natural, que se va producir con toa probabilidá -como vien siendo  vezu estos años de tras- nos prósimos meses d’avientu de 2017 y xineru de 2018.

La opinión xeneral de que los ríos salmoneros asturianos ufren los salmones de mayor pesu d’occidente a oriente vese sofitada polos datos recoyíos fasta’l intre. El Narcea ye’l riu nel que mayor númberu de salmones de seis o más quilos pescaron los deportistes de la caña,  entantu que’l ríu Eo ye’l que mayores salmones ta apurriendo a los aficionaos, con una diferencia de 447 gramos respeutu de les pieces del ríu Sella, que per agora ye onde se tán pescando los salmones de menor peso mediu, siguíu pol Cares-Deva (252 g), Esva (211 g) y Narcea-Nalón (66 g).

Coles mesmes, tamién ye posible reparar que’l sistema hidrográficu más perxudicáu hasta’l día de güei no qu’a torna de salmones cinca, ye’l sistema Narcea-Nalón, siguíu, por esti orde, del Sella, Cares-Deva, Eo y Esva.

Finalmente la Real Asociación Asturiana de Pesca Fluvial apurre les zones de los distintos ríos salmoneros nos que el pescadores consiguieron estrayer los salmones que se lleven oficialmente controlaos hasta’l día 3 de xunetu

 Tabla 2 – captures por fastera

Los datos de captures respuenden a los recoyíos nes temporaes de pesca, de resultes de la información telefónica guetada diariamente nos Centros Oficiales d’Información y Precintaxe de Salmones pa la ellaboración de les cróniques que se faciliten diariamente al preslle de dichos centros. Trátase, poro, de datos non oficiales.

Tabla 3

This work is licensed under a Creative Commons Attribution 4.0 International License.