Músicos, hosteleros, vecinos y asociaciones siguen lluchando pola llegalización de la música en vivo n’Asturies. Güei, 29 de xunu, llevaron la so reivindicación a la cai con una rueda de prensa y un miniconciertu en direutu
Acordies la llexislación asturiana un llocal debidamente insonorizáu pa emitir música grabao dica 90dB, tien prohibío emitir cualesquier tipu de música en vivo, seique nun devase esos mesmos niveles.
Poro, ye bien probable qu’un altu porcentaxe de los conciertos que se vaigan a faer n’Asturies cada fin de selmana mientres tol branu seyan incomprensiblemente illegales.
Esta prohibición de los conciertos emana de la llexislación autonómica sobro Espectáculos (Decretu 91/2004) y Mediu Ambiente (Decretu 99/85), que la so redacción nun ye clara y dexa ensin mentar la posibilidá de facer espetáculos de música en vivo. Amás, el decretu del 85 nun ta harmonizáu cola posterior llei d’Espetáculos (Llei 8/2002).
Teniendo en cuenta que la dixitalización de conteníos restó ingresos a los intérpretes de mena bultable y lo difícil que ye dase a conocer nun mercáu musical monopolizáu poles grandes discográfiques, esaniciar los conciertos en direutu en llocales ye probablemente una de les víes más eficaces p’acabar cola creación musical asturiana, col evidente dañu económicu y cultural qu’implica pal país.
Los firmantes del manifiestu aportunen: “nun se trata de faer más ruíu, nin d’incumplir denguna norma. Más bien tolo contrario: consiste n’aplicar el xacíu pa solucionar un problema llexislativu asurdu.”
Redaición InfoAsturies
This work is licensed under a Creative Commons Attribution 4.0 International License.
