• Portada
  • >
  • Asturies
  • >
  • Por qué foi refugada la enmienda pa dotar de fondos l’asturianu

Por qué foi refugada la enmienda pa dotar de fondos l’asturianu

  • 28 Xunu, 2017

Les enmiendes que solicitaben presupuestu pal asturianu presentáronse’n bloque con otres a favor de mayores dotaciones pa la policía y la guardia civil, pente otres temes

La prensa nacional faise ecu del refugu a les enmiendes pa dotar a l’Academia de la Llingua de los fondos necesarios, destacando los votos en contra del PP, Foru, C’s, C.Canaria, UPN y PNV asina comu la llamativa astención  d’EH Bildu, Nueva Canaria y l’Agrupación Socialista de la Gomera, noticia que nun primer intre indigna y sospriende a partes iguales.

Un analís más fonderu de la tema  danos otru puntu de vista. Les enmiendes nun se presenten nel Senáu individualmente, sinón en bloques, nos que se xunen delles temes que se voten de mena conxunta, resultando que ye imposible sofitar ún d’ellos ensin dar el votu tamién al restu.

En concretu, la enmienda que solicita la dotación con 100.000 € pa la ALLA, inclúyese  nun bloque d’alrodiu de 50 enmiendes de temática bien diversa y ayenes dafechu a la cuestión llingüística –na imaxe, la enmienda del asturianu ye la 1153, nel tercer bloque-

Asina atopamos, por casu, na ennmienda presentada por Compromis, la creación d’una nueva comisaría en Torrevieja o la costrución d’un nuéu cuartel de la guardia civil n’Alacant presentaes de manera indixebrable de la solicitú de financiamientu pal asturianu. “Cuando nun bloque tase acordies con una parte y en desalcuerdu con otres lo avezao ye astenese” desplica Jon Iñarritu, senaor d’EH Bildu, quien esclaria que la so formación nun embaraxó en dengún momentu votar en contra del financiamientu del asturianu, pero que tampoco se plantegaron dar el so votu a les otres cuestiones presentaes nel mesmu bloque.

Iñarritu destaca amás la inutilidá de la presentación d’enmiendes énte’l Senáu, una y bones la mayoría del PP torga de man que denguna d’elles salga alantre. “De les 7.000 enmiendes presentaes salieron aprebaes esautamente cero, tratase d’una cuestión d’allugamientu políticu, namás.” Poro’l so partíu, cosciente de que la única posibilidá de sacar alantre cualisquier cuestión pasa pel Congresu, non pel Senáu, optó por presentar una única enmienda a la globalidá.

Llucía F. Marqués

This work is licensed under a Creative Commons Attribution 4.0 International License.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies