La necesidá de contar con puntos d’alcuentru común, respetuosos cola llingua, onde families, asociaciones y particulares puean convivir y desendolcar los sos proyeutos llibremente llevó a la creación de El Rellugu, un espaciu d’alcuentru na  Casa’l Ferrocarril de Bimenes

“El Rellugu naz cola necesidá de xenerar llugares comunes d’alcuentru y alderique como motor de tresformación social y espoxigue de la cultura. La Casa’l Fierrocarril sedrá d’esti mou un espaciu vivu onde les persones tengan la posibilidá d’alcontrase, desarrollar el so potencial, descubrir, pero, sobre too, un espaciu onde convivir.”

Les actividaes vertebraránse en 3 estayes dixebraes ya interdependientes: Bris de Valle, Abellugu Asociativu y Espaciu Sideral, dedicaes respeutivamente a xestionar actividaes venceyaes al deprendizaxe, proyeutos artístico- culturales y  ufrir un puntu d’alcuentru a presones y asociaciones..

Bris de Valle cubre una demanda mui estendía pente les families asturianes, un espaciu de formación en tornu al acompañamientu emocional na crianza respetuosa y nos procesos de deprendizaxe, respetuosu a los ritmos naturales de les neñes y los neños; un llugar d’alcuentru de persones de diferentes edaes, habilidaes ya intereses onde’l xuegu,como motor de deprendizaxe, seya llibre y llibre de xuicios. El Rellugu ufre recursos pa enfoques metodolóxicos allonxaos de los avezaos nun ambiente natural y cercanu.

El Abellugu asociativu xestiona la Casa’l Fierrocarril como espaciu abiertu a otros proyeutos, iniciatives ya idegues que quieran averase, compartir y beneficiase de los recursos qu’ufre’l conceyu Bimenes, más de 350 m2 al serviciu d’asociaciones y proyeutos educativos y socioculturales.

Pa finar, Espaciu Sideral ye’l proyectu artísticu d’El Rellugu que fai apueste pa dinamizar la cultura nel conceyu dende un enfoque abiertu y participativu, ufriendo un llugar d’alcuentru

Creativu. Nesta estaya cuenten con entamar cursinos de teatru, danza, esperimentación artística,talleres temáticos d’estremaes disciplines artístiques, artesanales y culturales,etc, pero sobre tou va ser un llocal d’ensayu y alcuentru d’artistes y un espaciu de representación d’obres escéniques, conciertos, llectures, instalaciones, etc.

Llucía F.Marqués

This work is licensed under a Creative Commons Attribution 4.0 International License.