El secretariu de Seguridá del Estáu Español participó nun actu de xura de bandera que finó con una ufrienda floral na Cruz de los Cayíos

José Antonio Nieto sigue siendo un personaxe polémicu na vida política del Reinu d’España, yá que recientemente participó nun actu “patrióticu” realizáu en Dos Torres (Córdoba), que incluyó una ufrienda floral na cruz de los cayíos franquistes que tovía pervive nesi pueblu, magar de la Llei de Memoria Hestórica.

L’actu tuvo organizáu pol Ayuntamientu, gobernáu pol Partíu Popular, y la Base Aérea de Morón. Cuntó cola presencia de más de 200 persones que taben apuntaes previamente pa prestar xuramentu o promesa a la bandera española bicolor.

Ente los asistentes tamién s’atopaben dalgunes personalidaes del Exércitu español del Aire, como’l Xeneral de División Pablo José Castillo Bretón, director d’Enseñanza del Mandu Personal d’esa fuercia.

Nel madrilanu Congresu de los Diputaos tanto EH Bildu como Unidos Podemos yá protestaron por esti fechu, que consideren “inaceptable”, y rexistraron diverses entrugues en rellación al actu.

This work is licensed under a Creative Commons Attribution 4.0 International License.