Concentración de docentes el 18 de mayu

  • 17 Maio, 2017

La Xunta personal Docente reclama l’apertura de negociaciones cara a recuperar los drechos perdíos por mor de los socesivos retayos n’educación. “Si queremos una educación pública asturiana de calidá, ye necesario avanzar n’alcuerdos que nos dexen mermar les consecuencies de los retayos”

El RD 14/2012 de midíes urxentes de racionalización del gastu públicu introduxo nel ámbitu educativu los mayores retayos de les últimes décades, con midíes que lleven a la multiplicación de xeres y a incumplimientos como que nun haya un tutor de la especialidá de Primaria per cada unidá, que s’obligue al profesoráu especialista a compatibilizar les sos xeres col desempeñu de la tutoría, que se suprimieren sofitos cola siguiente falta d’atención a la diversidá, etc. La medría de les hores lleutives en Secundaria, FP, Enseñances Artístiques ya Idiomes, impuesta n’Asturies al profesoráu ye la mayor de tol Estáu.

Según el sindicatu d’ensiñantes asturianos, SUATEA, los retayos amenorguen tamién les  posibilidaes d’actuación del profesoráu ante l’acosu escolar. L’aumentu del trabayu burocráticu, de les hores llectives y d’alumnáu per aula, la falta de personal pa faer sofitos o desdobles y l’ausencia de profesionales non docentes, como trabayadores sociales que pudieren realizar un trabayu más personalizáu y específicu, repercuten negativamente na capacidá pa encetar los problemes de convivencia y violencia que supón el bullying

“La Conseyería d’Educación y Cultura amuésase inoperante al respeutive de les esixencies sindicales relatives a la reversión de los retayos qu’afeuten a les condiciones llaborales del profesoráu y a la so xornada llaboral.”declaren dende la Xunta de Personal Docente.

Poro, les organizaciones sindicales que la integren convoquen al profesoráu asturianu a participar na CONCENTRACIÓN, que va tener llugar el próximu xueves 18 de mayu, a les 18 hores, na Plaza España d’Uviéu

This work is licensed under a Creative Commons Attribution 4.0 International License.

Deixa unha resposta

O teu enderezo electrónico non se publicará Os campos obrigatorios están marcados con *