Espediente a la Casa Conceyu d’Ayer por daños ambientales

  • 9 Maio, 2017

La Confederación Hidrográfica’l Cantábricu vien d’abrir un epediente sancionador pola tala d’árboles, vadeo de calces y depósitu de ramaxes nos calces de 7  regatos afeutaos poles obres de costrución d’una pista

La ampliación d’una senda peatonal (PR) dica convertila nuna pista qu’algama, en dalgunos tramos, los siete metros d’ancho, provocó abondoses estroces nel so percorríu, qu’abarca nueve km, dende la llocalidá de Llananzales fasta’l Puertu de Piedrafita. Durante les obres arramplóse cola vexetación de les sos orielles, pente la que s’alcontraben dellos árboles importantes como fayes centenaries y castañales enormes nuna fastera de gran bayura biolóxica, con presencia d’osos y cantaeros de pitu montés que se vieron afeutaos.

La obra ya taba siendo investigada poles numberosas irregularidaes cometies, ya que nun tinía permisu del “Principado” pa les llabores desendolcaes, precisamente por mor del eleváu valor natural de la zona. Pesi a les reiteraes denegaciones de permisos, les obres foron financiaes pola Casa Conceyu d’Ayer a petición de los vecinos.

La Coordinadora Ecoloxista d’Asturies reclama al “Principado” que investigue como se pudo executar esta obra ensin que la guardería la detuviere ante los severos daños causaos nuna zona d’elleváu valor natural.

Tamién desixen que los responsables asuman la recuperación de la fastera na midía de lo posible y que se señalice la pista como d’usu esclusivamente ganaeru, pa evitar l’usu  masivu de tooterrenos na zona, evitando que s’utilice con fines turísticos, como paez la intención de la Casa Conceyu.

Esti nun ye un casu aislláu , ya que pesi a la continua redución del seutor ganaeru n’Asturies, tan construyendose decenes de pistes d’usu teóricamente ganaeru, con costes millonarios que paradóxicamente suelen salir de fondos pa conservar los ecosistemes singulares de la Cordillera, dañando zones d’altu valor natural. La C.E.A denuncia que l’usu que se da a eses pistes a posteriori ye bien distintu al ganaeru, pese a la illegalidá qu’esto constitui.

         Llucía Fernández Marqués

This work is licensed under a Creative Commons Attribution 4.0 International License.

Deixa unha resposta

O teu enderezo electrónico non se publicará Os campos obrigatorios están marcados con *