Les chimenees d`Arcelor siguin güei actives y fumiantes

  • 26 Abril, 2017

Delles persones ingresaes por intosicación, cientos de ciudadanos protestando nes cais, la tardía orde del “Principado” de parar la planta… nada detién a Arcelor?

“Tán gasiándonos”, esi yera`l  glayíu de los vecinos d`Avilés dempués de carecer la mayor nube de trióxidu d`azufre de les munches que se van llanzando al cielu asturianu. Les nubes acedes prevocaes poles bateríes de coque foron denunciaes dende va años por colleutivos como la Coordinadora Ecoloxista d’Asturies  y Andecha Ástur, que llegaron a llevar la tema ante`l Parlamentu Européu, ensin que se tomare nenguna midida al respeutu.

Agora, tres l`ingresu de delles persones gravemente afeutaes pola nube tósica y gran  parte de la población avilesina con problemes respiratorios ya irritaciones en güeyos y gargüelu, la Fiscalía pidi un informe ya’l “Principado” ordena que se pare la planta que prevocó l`episodiu contaminante, “Un auténticu trunfu. Dempués d`años esixendo`l so zarru, nun fixo falta más qu`una intosicación masiva por que`l “Principado” actuara.” Declara con ciertu sarcasmu Duce Xil, responsable de la estaya de Sanidá y Asociaciones d`Enfermos de Andecha Ástur.

Sicasí, paez que nin siquier esti envelenamientu masivu ye abondo p’aparar a Arcelor, la semeya d`esta noticia ta tomada esta mesma mañana y nella puede vese que, seique nun se distinga de que calter son les emisiones, la planta sigui furrulando.

Llucía Fernández Marqués

This work is licensed under a Creative Commons Attribution 4.0 International License.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *