La Conseyería d’Emplegu tien abiertes dos llinies de sofitu pa los artesanos asturianos, les feches llende pa presentar la documentación son el trenta d’abril ya’l quince de mayu respeutivamente

Estes subvenciones tan empobinaes esclusivamente a artesanos residentes n’Asturies que ten inscrites nel Rexistru d’Empreses y Talleres Artesanos d’Asturies y tienen l’envís de meyorar les oportunidaes de medrar de los artesanos asturianos, daqué que se persigue per dos víes estremaes.

Per un llau, l’alministración quier sofitar les meyores nos talleres de los artesanos, pa lo que se destina un total de cuarenta mil euros a repartir pente aquellos que xustifiquen una anovación importante nes sos istalaciones y medios téunicos.

Per otru llau, col envís de crear nueos mercaos, ameyorar la formación de los nuesos artesanos y la imaxe de l’artesanía asturiana fuera’l país, subvencionaránse aquellos que visiten o participen en feries o cursos de perfecionamientu profesional cellebraos fuera del ámbitu asturianu. Tolos artesanos que participen en feries o cursos nel estranxeru con una duración non menor a dos díes ente’l 1 de payares del 2016 y el 31 d’ochobre del 2017 pueden optar a recibir pente’l 30 % ya’l 50% de la inversión, con un importe másimu de 1.200 euros por visita y taller, siempres que nun se pase la llende de 5.000 euros por solicitante y añu

Fasta’l díi trenta entá ye posible presentar los documentos pa pidir un sofitu económicu pal perfecionamientu profesional de los artesanos, l’acesu de los sos productos a mercaos nuevos y  la meyora de la imaxe esterior de tola artesanía asturiana. Les subvenciones pa inversiones en talleres d’artesanía creativa y artística podrán solicitase fasta’ l quince de mayu.

Llucía Fernández Marqués

This work is licensed under a Creative Commons Attribution 4.0 International License.