El Restorán “As de Piques” llevóse’l Campanu d’Asturies por 9.500 € ya’l Restorán “El Campanu” el del Sella, por 9.900 €

Cientos d’aficionaos a la pesca averáronse a primer hora hasta los ríos salmoneros nel primer día d’apertura de la veda, que se va caltener abierta hasta’l 15 de xunetu.

El primer salmón de la temporada madrugó abondo, el so pescador, Alejandro Pérez, nun precisó nin siquier una hora pa sacalu del Pozu los Cables, nel ríu Eo, dende onde viaxó hasta Xixón, al restorán “As de Piques”, que pagó polos sos cuasi seis quilos un total de 9.500 euros, llueñe de los18.000 euros que llegaron a pagase pol Campanu nel añu 2007 pero bien perriba los 3.700 euros que se pagaron pol Campanu que se pescó’l pasáu añu, tamién nel ríu Eo.

El Campanu del ríu Sella fíxose más de rogar ya entardó otra hora y media n’allegrar el día al so pescador, Juan Antonio González. Anque yera una pieza de menor tamañu, 4,2 quilos, el preciu algamáu foi mayor, 9.900 euros que pagó con gustu’l Restorán El Campanu, de Cangues, pa poder asina faer  honor al so nome.

Llucía Fernández Marqués

This work is licensed under a Creative Commons Attribution 4.0 International License.