Estudiantes protesten pola llectura del “Pregón del Costaleru”, que tuvo llugar na capiella  l’Edificiu Hestóricu de la Universidá d’Uviéu, eventu entamáu pola Cofradía d’Estudiantes.

Dende les Asamblees Abiertes d’Estudiantes, el Frente Feminista UniOvi y el Conseyu d’Estudiantes de la Universidá d’Uviéu, amosaron el so refugu escontra la cesión d’espacios de la Universidá d’Uviéu a la Hermandá d’Estudiantes y desixeron al Rectoráu que paralizare l’actu.

Esti eventu ta organizáu por un coleutivu  –la Hermandá d’Estudiantes-  ensin venceyar a la Universidá d’Uviéu y que los sos integrantes mayoritariamente nun son nin estudiantes, pero que cuenten con un conveniu añal col Rectoráu de la Universidá d’Uviéu nel que se-yos ceden espacios comunes pa entamar actos de marcáu calter relixosu ya ideolóxicu.

Los estudiantes parten de la convicción de que nun ye pertinente la esistencia de llugares de cultu relixosu dientro de les dependencies d’una Universidá pública y llaica “Dende’l más absolutu respetu a toles creencies y a la llibertá de cultu, entendemos, y asina lo diz la llei, que los espacios públicos tienen de ser acofensionales.”

Señalen tamién que la persona que pronució’l pregón, Álvaro Ojeda ye un personaxe públicu conocíu polos sos videos de calter misóxinu, racista, homófobu y xenófobu en redes sociales, lo que fai l’actu más inapropiáu, si cabe, nuna universidá que los estudiantes y la sociedá asturianos nagüen llaica.

Pel so lláu, Ojeda acusó a los estudiantes de la universidá de llanzar a la so escontra lo que llamó un “escrache podemita”.

This work is licensed under a Creative Commons Attribution 4.0 International License.