Aición social escontra los abusos de les llétriques

  • 13 Marzu, 2017

Esti fin de selmana vien de presentase en  Mieres la Plataforma Escontra los Abusos de les Llétriques, una nuedu más na rede d’actuación social que trata de protexer a los asturianos de les trapaceríes de les empreses llétriques

La Plataforma Escontra los Abusos de les llétriques son un ensame de presones afeutaes polo que ya entama a llamase el “tarifazu llétricu”, que nun se conformen con ver cómo ca vegada yos resulta más difícil pagar esti bien básicu y decidieron entamar una riestra de charres per estremaes llocalidaes de la xeografía nacional p`aniciar una rede asturiana de rempuesta a los abusos. “Queremos llegar a toles ciudaes, barrios y pueblos, coscientes de que’l compromisu escontra los abusos del oligopoliu llétricu tien d’implicamos a toles presones.

Nes sos sesiones informatives falen de determinaes táutiques de les compañíes pa beneficiase, camudando de contratos o de potencia, animen a la xente a afayar la potencia contratao a les necesidaes de ca llar, informen del bonu social y dan trucos p’amenorgar no posible la factura la lluz.

Dende esta asociación denuncien les polítiques xenerales d’un gobiernu, l’español, que caltién un sistema llétricu que da les espaldes a los intereses de la ciudadanía a favor de les cinco grandes compañíes que controlen el sector.

Esti vienres visitaron Mieres y con anterioridá ya dieron la so información en dos barrios d’Uviéu y en Llangréu. Los siguientes conceyos que cuenten visitar son Tapia y Xixón.

Dexa una rempuesta

O teu enderezo electrónico non se publicará