Cúmplense los piores pronósticos no que cinca a la cuota de los autónomos asturianos

Esti mes el recibu de los autónomos societarios aportó cola sospresa d´un incrementu del ocho por cientu so la ya desaxerada tasa que veníen pagando. A los autónomos individuales, entá nun yos aportó la subida, que nel so casu sedrá del ún por cientu, pero namás por cuestiones téuniques transitories: el cargu vendrá pal recibu que vien, incluyendo la parte correspondiente a lo que nun dio tiempu a actualizar nesti cobru.

La subida ya yera esperada por delles asociaciones d’autónomos, acertando mesmo  col porcentaxe esautu d´incrementu -el mesmu que´l del SMI- pero los trabayaores nun recibieron dalu avisu fasta l´intre mesmu de facer efeutivu’l cobru.

Arturu Xosé Bermeyu, Secretariu Xeneral d Andecha Astur denuncia que si bien esta ye una subida ye abusiva, ya anantia d´estos cambeos la situación de los autónomos asturianos yera de clara desventaxa frente a la d´otros trabayaores europeos: “Un autónomu portugués nun pagará res pol drechu a trabayar y tampoco lo fadrá un francés nel so primer añu, tres del que pagará en función de los sos ingresos, lo mesmo que n´Inglaterra, onde´l mínimu ta en doce euros añales o Holanda, onde la cuota fixa ronda los cincuenta al añu, demientres qu´un asturianu entamará pagando alrodiu de trescientos euros dende´l primer díi, lo que nun pué sinón mermar la nuesa capacidá de competir nel mercáu internacional”

L´añu pasáu la cuota d’autónomu subiere un 1%, tanto pa societarios comu pa individuales.

This work is licensed under a Creative Commons Attribution 4.0 International License.